U Ka’a Tsoolil Meyajo’obil utia’al Le Yaanal Campaniail Yucatáne’

Texto en maya: actividades de La Otra Campaña en Yucatán

17 de enero 2006

Ti tuláaklo’one’ex ts’o’ok a wokle’ex ichil le meyaja’ ku ya’alal le Yaanal Campaniao’ yéetel le Sexta Declaración ti Selva Lacandonao’ (ku ya’alalo’ob adherentes).

Ti tuláaklo’one’ex taak a wokle’ex ichil le Yaanal Campaniao’ chen ba’ale ma’ jets’e’exe’ wáa ma’ a wojle’ex bix u páajtal a wokle’exe’ (ku ya’alalo’ob simpatizantes)

Ti tuláaklo’one’ex ka meyaje’ex, ka tuukule’ex yéetel ka ketlanmuuk’e’ex tu yiknalo’ob ootsilo’ob (ku ya’alale’ de izquierda, xts’íik k’aabe’ex) utia’al ka lobintke’ex u muuk’il le ta’k’iino’ (ku ya’alale’ capitalismo). U k’áat u ya’ale’ ti tuláak le maaya wíiniko’obo, le jmeyjil máako’obo’, le jkoolnaalo’obo’, le chuk kay máako’obo’, le ka’ansaj máako’obo’, le kaanbal máako’obo’, le máaxo’ ku meyajo’ob ich naj, le jmejen kóonol máako’obo, le mejen empresario’obo’, le máaxo’ ts’o’ok u jáawal u meyjo’obo, le máaxo’ ku meyajo’ob le tuukulo’, le páaxilo’, yéétel le bonilo’obo’; le tankelem máako’obo’, le koolelo’obo’, le úuchben máako’obo’, le síis óol máako’obo’, le xíipalo’obo’, le xch’upalo’obo’, le máaxo’ ku num chi’o’ob, le páaxnáalo’obo’, le artesano’obo’, yéetel tuláak le máako’obo’ cheen tu juuno’ob ma’ ku táakpajalo’ob ichil junp’éel partido político.

Ti tuláaklo’one’ex le kaajnáalo’obil Yucatano’

To’one’ le múuch’ máako’obo’on, ts’o’ok k okol ichil le Sexta Declaracion ti Selva Lacandonao’, k táakpajal ichil le Yaanal Campaniao’, tumen jelpaj u xíinbalil le Comision Sexta ti le Ezetaeleneo’, bejlae’ táan k ts’áaik a wojelte’ex le túmben tsoolil le meyajo’obo’ yaan k beet utia’al u xíinbalil wey Yucatane’ tumen le Subcomandante Insurgente Marcos, ku ya’alal Delegado Zero xano’. Letie’ yaan u taal utia’al 18 taak 20 ti enero ti 2006. To’one’ k payal óoltke’ex ka táakpajke’ex ti le meyajo’ob kun úuchul utia’al tuláakal le máako’obo. Bey kun yúuchula’:

U TSOOLIL LE MEYAJO’OBA’

Miércoles 18 ti enero ti 2006.
Kúuchil: Casa Comunitaria Uay Ja’, Chablekal, Mérida.

Yaan k meyaj tuláak le k’íina’. Ti las 9:00 sáamale’ yaan k káajsik le meyajo’obo. Ti yáax táanile’ yaan k ts’aikuba k’ajoltbil yéetel báax k meyajo’ob; ts’o’okole’, yaan k ts’aik báax k tuukul yóolal le Sexta Declaraciono’ yéetel le Yaanal Campaniao’; ts’o’okole’, yaan k tsikbal yóolal le 6 puntoso’ utia’al u beeta’al le Yaanal Campaniao’. Le jelo’oba’, letie 6 puntoso’:

Punto 1. Wáa tuláak le máako’obo’ ma’alob yilko’ob wáa ma’, yéetel bix yaan u yúuchul le Yaanal Campanial bey ala’abi’ ichil le Sexta Declaracion ti Selva Lacandonao’.

Punto 2. Máax u páajtal u táakpajlo’ob, máax ma’ u páajtal.

Punto 3. Bix yaan k múuch’ meyaj ichilo’on.

Punto 4. Wáa yaan junp’éel kúuchil especial ichil le Yaanal Campaniao’ utia’al le máasewalo’obo, le koolelo’obo’, le síis óolo’obo’, le tankelemo’obo’, le paalalo’ yéetel uláak jéejelas máako’obo’.

Punto 5. Báax k tuukul bey le Yaanal Campaniae’ yóolal uláak’ meyajo’ob ti política. Punto 6. Báax yaan k beetik séeban (ts’aa t’aanil, tsikbal wáa uláak meyaj).

Le múuch’ meyaj wáa nojoch asambleaa’ yaan u biilal utia’al k tsikbal le 6 puntosa’ ichil le ku ya’alalo’ob adherenteso’. Chen ba’ale’ tuláakal le máako’ob ma’ adherenteso’obo’ ku páajtal u yiliko’ob yéetel u wu’uyiko’ob le tsikbalo’obo’, taak le máako’obo’ ti le prensao’, ti le televisiono’, yéetel ti le radioo’, ku meyajo’ob chen tu juuno’ob wáa utia’al u yumilo’ob, le ayik’alo’obo’.

Ba’ale’ cheen le ku ya’alalo’ob adherenteso’ u páajtal u tsikbalo’ob ti le nojoch asamblea ti le yáax k’íina’. Le ku ya’alalo’ob adherenteso’, tuláakal le máako’obo’ ts’o’ok u ts’íibtik u k’aabao’obo layli’e’ u tuukule’ yéetel báax ku ya’alik le Sexta Declaracion ti Selva Lacandonao’ yéetel u k’áato’ob okol ichil le Yaanal Campaniao’.

Tuláakal le yáax k’íina’ unaj yaantal junp’éel kúuchil tu’ux u páajtal a ts’íibtike’ex a k’aabae’ex wáa layli’e’ a tuukule’ex yéetel le Sextao’ wáa a k’áate’ex okol ichil le Yaanal Campaniao’.

Wáa yaan computadorail yéetel Internet le tu’ux kajane’exo’ ku páajtal a wike’ex báax ku ya’alik le Sextao’ ti le kúuchila’: http://enlacezapatista.ezln.org.mx/especiales/2/

Ti le k’íina’ unaj yaantal ya’ab mejen je’elelil utia’al janal yéetel utia’al tsikbal ichilo’one’ex bey ichil suku’untsililo’ob.

Jueves 19 ti enero.
Laylie’ kúuchilo’.

9:00 a.m. Wáa u ts’o’okol le meyajo’ob ti le yáax k’íino’, bin u yúuchul junp’eel reunion chen ichil le ku ya’alalo’ob adherenteso’ utia’al u beeta’al k’ax t’aanilo’ob. Ti le múuch’tala’ yaan u k’áata’al ti tuláakal máako’ob ma’ adherenteso’ob ku bino’ob ti uláak kúuchil. Wáa ma’ tu ts’o’okol le meyajo’obo’ ti le yáax k’íino’, k’aabet k baykuntik le tsikbalo’obo’ taak u ts’o’okol le 6 puntoso’. Ts’o’okole’, yaan k beetik le múuch’talo’ chen ichil le adherenteso’.

6:00 p.m. Nojoch asamblea yéetel tuláakal máako’ob taak u yojeltko’ob maas yóolal le Yaanal Campaniao’ wáa uts’ u yu’ubiko’ob yóolal le Sextao’, le ku ya’alalo’ob simpatizanteso’.

Viernes 20 ti Enero
Laylie’ kúuchilo’.

9:00 a.m. Le Subcomandante Marcoso’, ku ya’alal Delegado Zero, yaan u tsikbal yéetel le máako’obo’ wáa le organizaciono’obo’ úuch u k’áatik ti’o’. Yaan jéejelas bix utia’al u k’áatik le tsibalo’oba’ yéetel J-Delegado Zero. Yaan formas utia’al u beeta’alo’ ti le kúuchila’ ich Internet: http://enlacezapatista.ezln.org.mx. Le tsikbalo’oba’ yéetel tu juunal máak wáa ti junp’éel organización, utia’al u k’axik u t’aano’ob wáa utia’al u beetik junp’éel meyaj yéetel le J-Delegado Zeroo’.

6:00 p.m. Nojoch reunion utia’al k ts’aik ojeltbil le k’ax t’aanilo’obo’ yéetel u chúunpajalil le meyajo’ob wey Yucatane’ ti le “Campania yéetel junp’éel Yaanal Politica utia’al u beeta’al junp’éel Tsoolil Meyajo’ob tu yiknalo’ob le Ootsilo’obo’ yéetel utia’al u náajal junp’éel Tumben Almaj T’aan tu Noj Lu’umil Mexico”. Kúuchil: Nojoch K’íiwik, Jo’ (Plaza Grande, Mérida).

Le Tsoolil Meyajo’oba’ beeta’ab múul yéetel u Comision Sexta ti le Ezetaeleneo’.

Tuláakal le t’aano’obo’ yóolal le Yaanal Campaniao’ wey Yucatane’ u páajtal a wojeltike’ex ti le kúuchila’ ich Internet:

Centro de Medios Independientes de Yucatán:
http://imc-yucatan.espora.org
http://imc-yucatan.org

Meenta’ab tumen:
Le Yaanal Campaniail Yucatáne’
Máako’ob K’ubena’an ti Ts’aa T’aanil
losotrosmediosyucatan@gmail.com

Haz click aquí para más del Otro Periodismo con la Otra Campaña

For more Narco News, click here.